រព្យាបាល ការថែទាំ និងការរស់នៅជាមួយមេរោគអេដស៍
តើបុគ្គលម្នាក់ដែលរស់នៅជាមួយមេរោគអេដស៍ និងជំងឺអេដស៍ គ្រាន់តែរស់នៅរង់ចាំថ្ងៃស្លាប់ឬ?
ទេ! អ្នករស់នៅជាមួយមេរោគអេដស៍ និងជំងឺអេដស៍ដែលជាមនុស្សសកម្មជាមួយនឹងសកម្មភាពសង្គមប្រហែលជាជួបការលំបាកខ្លះ ប៉ុន្តែពួកគាត់មិនគួរត្រូវបានចាត់ទុថាកជា អ្នកជំងឺ ឬ មនុស្សឈឺទេ។
ប្រសិនបើបុគ្គលម្នាក់មានផ្ទុកមេរោគអេដស៍ តើគាត់គួរធ្វើអ្វីខ្លះ ដើម្បីថែរក្សាសុខភាពរបស់គាត់?
ការដឹងថាមនុស្សម្នាក់មានផ្ទុកមេរោគអេដស៍ពិតជាសំខាន់ខ្លាំងណាស់ក្នុងការថែទាំសុខភាពរបស់គាត់ ដៃគូ និងកូនៗរបស់គាត់។ យើងត្រូវចងចាំថាមនុស្សម្នាក់អាចរស់នៅប្រកបដោយសុខភាពល្អបានលុះត្រាតែពួកគេចេះថែរក្សាសុខភាព ហើយទាំងនេះអាចធ្វើទៅបានតាមរយៈការស្វែងរកបណ្តាញគាំទ្រក្នុងការផ្តល់កម្លាំងចិត្ត ក៏ដូចជាការផ្តល់ព័ត៌មានពីអាហារូបត្ថម្ភ ការព្យាបាល និងវិធីសាស្រ្តក្នុងការរស់នៅដោយសុខភាពល្អ។
ហេតុអ្វីបានជាអាហារូបត្ថម្ភមានសារៈសំខាន់ខ្លាំងក្នុងការថែទាំសុខភាពរបស់អ្នកផ្ទុកមេរោគអេដស៍?
នៅពេលដែលមេរោគអេដស៍វិវត្តន៍នៅក្នុងខ្លួនរបស់មនុស្ស ដងខ្លួនរបស់គាត់ភាគច្រើនចាប់ផ្តើមចុះទម្ងន់។ មេរោគអេដស៍បានធ្វើឱ្យផ្លាស់ប្តូរ ដំណើរការរបបអាហារចូលទៅក្នុងខ្លួនរបស់មនុស្ស២យ៉ាង៖ ទី១ មេរោគអេដស៍បានកាត់បន្ថយលទ្ធភាពមនុស្សក្នុងការទទួលយកសារធាតុចិញ្ចឹម។ ទី២ អ្នកផ្ទុកមេរោគអេដស៍ ចាប់ផ្តើមបាត់បង់ទម្ងន់របស់សាច់ដុំ ច្រើនជាងជាតិខ្លាញ់ក្នុងខ្លួន។ នៅពេលដែលខ្លួនរបស់មនុស្សបាត់បង់ថាមពលដែលបានមកពីអាហារ នោះខ្លួនមនុស្សនឹងប្រើប្រាស់ថាមពលដែលបានមកពីសាច់ដុំជំនួសវិញ។ មនុស្សដែលមានសុខភាពល្អ ប្រើប្រាស់សារធាតុខ្លាញ់សម្រាប់ថាមពលបន្ថែមនៅពេលដែលអាហារដែលផ្ទុកនៅក្នុងខ្លួនមនុស្សត្រូវបានបាត់បង់។ ការបាត់បង់សាច់ដុំដំបូងពិបាកក្នុងការកត់សម្គាល់ណាស់ ពីព្រោះសារធាតុខ្លាញ់ដែលនៅជុំវិញសាច់ដុំនៅដដែល។ សាច់ដុំកើតចេញពីប្រូតេអ៊ីន ដូចនេះវាសំខាន់ខ្លាំងណាស់សម្រាប់អ្នកផ្ទុកមេរោគអេដស៍បរិភោគអាហារដែលមានជាតិប្រូតេអ៊ីនខ្ពស់។ លើសពីនេះទៀត អ្នកផ្ទុកមេរោគអេដស៍គួរតែទទួលទានសារធាតុកាបូអ៊ីដ្រាត ដោយសារក្នុងខ្លួនរបស់គាត់ ប្រើប្រាស់ថាមពលច្រើន ដើម្បីទប់ទល់នឹងមេរោគអេដស៍។ អាហារថាមពលដូចជា បាយ នំបុ័ង ដំឡូង និងអាហារដែលមាន ជាតិខ្លាញ់ និងប្រេង ហើយផ្តល់នូវថាមពលដែលបានមកពីសារធាតុស្ករ។ ប្រសិនបើបុគ្គលម្នាក់ដែលមានផ្ទុកមេរោគអេដស៍មិនបានទទួលអាហារថាមពលគ្រប់គ្រាន់ និងអាហារដែលមានប្រូតេអ៊ីនខ្ពស់ គាត់នឹងបាត់បង់សាច់ដុំសំខាន់ៗ ដែលធ្វើឱ្យខ្លួនប្រាណរបស់គាត់កាន់តែចុះខ្សោយ និងពិបាកកាន់តែខ្លាំងក្នុងការទប់ទល់នឹងជំងឺ។
តើការប្រឹក្សាយោបល់បានចូលរួមចំណែកអ្វីខ្លះក្នុងការថែទាំ និងគាំទ្រអ្នកផ្ទុកមេរោគអេដស៍ និងជំងឺអេដស៍?
ការផ្តល់ប្រឹក្សាយោបល់ ត្រូវបានចាត់ទុកថាមានសារៈសំខាន់ខ្លាំងក្នុងការថែរក្សា និងផ្តល់ការគាំទ្រដល់អ្នកដែលរស់នៅជាមួយមេរោគអេដស៍ និងជំងឺអេដស៍ ព្រមទាំងក្រុមគ្រួសារ និងសហគមន៍ដែលគាត់រស់នៅផងដែរ។ ការផ្តល់ប្រឹក្សាយោបល់ បានផ្តល់នូវព័ត៌មាន និងចំណេះដឹងសំខាន់ៗ ដល់អ្នកដែលផ្ទុកមេរោគអេដស៍ផ្ទាល់ ក៏ដូចជាគ្រួសារ និងមិត្តភក្តិរបស់គាត់។ ការផ្តល់ប្រឹក្សាយោបល់ ផ្តល់ការគាំទ្រពីសង្គម និងចិត្តសាស្រ្ត ហើយការគាំទ្រនេះបានរកឃើញថា អាចជួយដល់អ្នកផ្ទុកមេរោគអេដស៍ក្នុងការជំនះឧបសគ្គជាច្រើន និងយល់ដឹងពីវីធីសាស្រ្តក្នុងការរស់នៅវិជ្ជមាន ទោះបីជាមានផ្ទុកមេរោគអេដស៍ក៏ដោយ។ ការផ្តល់ប្រឹក្សាយោបល់ក៏ជួយក្នុងការកាត់បន្ថយការចម្លងរោគទៅដល់អ្នកដទៃផងដែរ។
ប្រភព៖ បកប្រែពី “សៀវភៅជំនួយស្មារតីសម្រាប់គ្រូបង្រៀនស្តីពីការអប់រំរឿងផ្លូវភេទ” TARSHI
Leave a Comment